All News Local News Peace

ဖမ်းဆီးစစ်ဆေး ပြန်လွှတ်ပေးပြီးနောက် ၃ ရက်အကြာ ဒေါ်စိန်မြဦးသေဆုံးမှု AA နှင့်မသက်ဆိုင်ဟု ထုတ်ပြန်မှု တာဝန်မဲ့ဟု ချင်းအမျိုးသမီးကွန်ရက် ဝေဖန်

ဖမ်းဆီးစစ်ဆေး ပြန်လွှတ်ပေးပြီးနောက် ၃ ရက်အကြာ ဒေါ်စိန်မြဦးသေဆုံးမှု AA နှင့်မသက်ဆိုင်ဟု ထုတ်ပြန်မှု တာဝန်မဲ့ဟု ချင်းအမျိုးသမီးကွန်ရက် ဝေဖန်

ရန်ကုန်၊ ဇွန် ၈

ရခိုင်ပြည်နယ် မင်းပြားမြို့နယ် သိုင်းကျပ်ကျေးရွာက ဒေါ်စိန်မြဦးကို AAက တစ်လကျော်ဖမ်းဆီးစစ်ဆေးပြီး ပြန်လွှတ်ပေးပြီးနောက် ၃ ရက်အကြာ သေဆုံးသည့်ဖြစ်စဉ်နှင့် ပတ်သက်ပြီး AA က၎င်းတို့နှင့် မသက်ဆိုင်ကြောင်းထုတ်ပြန်ခြင်းသည် တာဝန်မဲ့ရာရောက်ကြောင်း ချင်းအမျိုးသမီးကွန်ရက်မှ အဖွဲ့ဝင် ဒေါ်ခင်ဝင်းရီကပြောဆိုသည်။

AA က ဇွန်လ ၄ ရက်နေ့တွင် ကြေညာချက်တစ်ရပ်ထုတ်ပြန်ခဲ့ပြီး ယင်းကြေညာချက်တွင် မင်းပြားမြို့နယ် သိုင်းကျပ်ကျေးရွာသူ ဒေါ်စိန်မြဦး အသက် ၅၁ နှစ် မင်းပြားပြည်သူ့ ဆေးရုံတွင် သေဆုံးမှုသည် ၎င်းတို့နှင့်မပတ်သက်ကြောင်း၊ ဧပြီလ ၂၇ ရက်နေ့က ဒေါ်စိန်မြဦး နှင့်အတူ ဦးယောင်ဇာ၊ ဦးမောင်စိန်ဖြူ၊ ဦးစိန်ဝင်းကြိုင် တို့ကို ရာမောင်တံတားထိပ် စခန်းချ တပ်စွဲထားသော မြန်မာ့တပ်မတော်၏ စစ်သင်္ဘောသို့ ရိက္ခာပေးပို့နေသည့်အတွက် ခေါ်ယူစစ်ဆေးခဲ့ကြောင်း၊ ခေါ်ယူစစ်ဆေးစဉ် နှိပ်စက်ညှဉ်းပန်းမှု မလုပ်ဆောင်ခဲ့ကြောင်း၊ ဒေါ်စိန်မြဦးသည် နဂိုရှိရင်းစွဲ နှလုံးရောဂါနှင့် စိတ်ကျန်းမာရေး အားနည်းသော ရောဂါအခံပါရှိလာကြောင်း၊ မေလ ၃၁ ရက်နေ့တွင် ဒေါ်စိန်မြဦးနှင့် အမျိုးသား ၃ ဦးကို ပြန်လည်လွှတ်ပေးခဲ့ကြောင်း ၊ ဇွန်လ ၃ ရက်နေ့တွင် မင်းပြားမြို့နယ် ပြည်သူ့ဆေးရုံတွင် ဒေါ်စိန်မြဦး သေဆုံးသွားခဲ့ပြီး သေဆုံးမှုသည် AA နှင့် မသက်ဆိုင်ကြောင်း ကြေညာချက်ထုတ်ပြန်ခဲ့သည်။

“ သူတို့တာဝန်မဲ့တဲ့ ကြေညာချက်ထုတ်ပြန်ခြင်းအပေါ်မှာ ကျွန်မတို့က တုံ့ပြန်တဲ့ အနေနဲ့ ကြေညာချက် ပြန်ထုတ်တာဖြစ်တယ်။ အကယ်၍များ AA ဘက်ကနေလို့ ဒီလိုမျိုး သူတို့နဲ့ မဆိုင်ပါဘူး။ ဒေါ်စိန်မြဦး ကွယ်လွန်ရခြင်း ဒီအကြောင်းအပေါ်မှာ သူတို့နဲ့ လုံးဝမဆိုင်ပါဘူးဆိုတဲ့ ထုတ်ပြန်ချက်မျိုးသာမထွက်လာဘူးဆိုရင် ကျွန်မတို့က ဒီ ကြေညာချက် မျိုးကိုထုတ်ချင်မှထုတ်မယ်” ဟု ၎င်းကပြောဆိုသည်။

“ တစ်လကျော်ကြာ ထိန်းသိမ်းထားတဲ့အရာမျိုး ပြီးတော့ အညိုအမဲတွေစွဲတဲ့ အရာမျိုးက သူတို့နဲ့ လုံးဝမဆိုင်ပါဘူးဆိုတဲ့အရာမျိုး ၊AAကဖမ်းပြီးတော့မှ လုံးဝမိသားစုနဲ့တောင်မတွေ့ရဘူး။ နောက်မှမိသားစုတွေသိရတယ်။ မိသားစုတွေ ရောက်လာတဲ့အချိန်မှာ မိသားစုတွေကို ကြောက်တယ်။ နဂိုစိတ်တွေ လုံးဝမရှိတော့ဘူး။ လူတွေကိုကြောက်တယ်။ ဘာမှမသိတော့ဘူး။ ဘာမှ မပြောနိုင်တော့ဘူးဆိုတဲ့ အနေအထားမျိုးဆိုတော့ ဘယ်လောက်အထိ သူအကြမ်းဖက်ခံရပြီလဲ။ AAကမဖမ်းရင် ဒီလိုတွေ ဒေါ်စိန်မြဦးဖြစ်စရာ ဘာအကြောင်းမှမရှိဘူး” ဟု ဒေါ်ခင်ဝင်းရီကပြောဆိုသည်။

ချင်းအမျိုးသမီးကွန်ရက်က AA၏ ထုတ်ပြန်ချက်အပေါ် ပြင်းထန်စွာ ကန့်ကွက်ရှုတ်ချကြောင်း ဇွန်လ ၆ ရက်နေ့တွင် ကြေညာချက်တစ်စောင်ထုတ်ပြန်ခဲ့သည်။

“ ကျွန်မတို့မှာ လူမျိုးရေးမုန်းတီးမှုမရှိပါဘူး။ ဘယ်လူမျိုးမဆို ကျွန်မတို့ ချင်းအနေနဲ့ ဘယ်လူမျိုး ဘယ်လူမျိုးဖြစ်နေလို့ပါ ဆိုတဲ့ဟာမျိုး လူမျိုးရေး မုန်းတီးမှုမရှိဘူး။ လူမျိုးရေးမုန်းတီးမှုကြောင့် ဒီထုတ်ပြန်ချက်ကို ထုတ်ပြန်တာမဟုတ်ဘူး။ သူတို့ဖက်က တာဝန်မဲ့လွန်းတဲ့အတွက်ကြောင့် ကျွန်မတို့က ဒီထုတ်ပြန်ချက်ကို ထုတ်ပြန်တာဖြစ်တဲ့အတွက်ကြောင့် ကျန်တဲ့တိုင်းရင်းသား ညီအမတွေ အမျိုးသမီးတွေက ဒါမျိုးတွေ ထပ်ကြုံမယ်ဆိုရင်လည်း ကျွန်မတို့ကတော့ အမြဲတမ်းပူးပေါင်းပါဝင်ပေးမှာဖြစ်တယ်ဆိုတာ ပြောချင်တယ်။ အထူးသဖြင့် ရခိုင်လူမျိုးတွေကို မုန်းတီးလို့ လုပ်တာမဟုတ်ဘူး။ နောက်ပြီးတော့ AAကို နိုင်ငံတကာက အထင်မှားအမြင်မှားဖြစ်လာဖို့အတွက် AAကို ကျွန်မတို့က လုပ်ဇာတ်ထွင်ပြီးတော့ ဒီလိုမျိုးလုပ်တာမဟုတ်ဘူး။ သူတို့ရဲ့ ထုတ်ပြန်ချက်အပေါ်မှာ ပြန်တုံ့ပြန်တာဖြစ်တယ်” ဟု ဒေါ်ခင်ဝင်းရီက ဆက်လက်ပြောဆိုသည်။

ချင်းအမျိုးသမီးကွန်ရက်၏ ထုတ်ပြန်ချက်တွင် AA က ဒေါ်စိန်မြဦးကို ဧပြီလ ၂၇ ရက်နေ့မှ ဇွန်လ ၁ ရက်နေ့အထိ ၁ လကျော်ကြာ ထိန်းသိမ်းထားခဲ့ကြောင်း၊ ဒေါ်စိန်မြဦး ပြန်လည် လွတ်မြောက်လာချိန်တွင် မူလသာမန်စိတ်နေစိတ်ထား ပျောက်သွားသည့်အပြင် အသက်ရှုလမ်းကြောင်းများ ပုံမမှန်ခြင်း၊ ကြောက်ရွံ့တုန်လှုပ်ခြင်း၊ ခြောက်ခြားခြင်း၊ စိတ်ပိုင်းဆိုင်ရာ ရုပ်ပိုင်းဆိုင်ရာများ ထိခိုက်နေခဲ့ကြောင်း၊ လက်ကောက်ဝတ်နှစ်ဖက်စလုံးနှင့် နောက်ကျောဘက်တွင် အညိုအမည်းများ စွဲနေကာ ခြေထောက်နှစ်ဖက်စလုံးတွင်လည်း ဒဏ်ရာများရှိနေခဲ့ကြောင်း၊ ဇွန်လ ၃ ရက်နေ့တွင် ကွယ်လွန်ခဲ့ကြောင်း၊ AA ၏ ထုတ်ပြန်ချက်ကို ရှုတ်ချကြောင်း၊ ယခုကဲ့သို့ အမျိုးသမီးများအပေါ် စိတ်ပိုင်းဆိုင်ရာ ရုပ်ပိုင်းဆိုင်ရာ အကြမ်းဖက်မှုများ နောက်နောက်တွင် မပြုလုပ်ရန်နှင့် တိုက်ပွဲများအတွင်း အမျိုးသမီးများနှင့်ပတ်သက်၍ တပ်ဖွဲ့များက ကျင့်သုံးရန် ထုတ်ပြန်ထားသည့် UN Security Resolution 135 ပါ အချက်ကို လိုက်နာကျင့်သုံးရန် တောင်းဆိုကြောင်း ဖော်ပြထားသည်။

သင့်ရဲ့ထင်မြင်ချက်ကို မှတ်ချက်ပေးလိုက်ပါ

Related Posts