All News Local News

ငွေကြေးသိန်းပေါင်း ၃၉၅၀ လာဘ်စားသည့် ကင်မွန်းချောင်းကျေးရွာအုပ်ချုပ်ရေးမှူးဟောင်းကို အလုပ်နှင့်ထောင်ဒဏ် ၇နှစ်ချ

ရန်ကုန်၊ ဒီဇင်ဘာ ၁၇

ငွေကြေး သိန်းပေါင်း ၃၉၅၀ လာဘ်စားသည့် ကင်မွန်ချောင်းကျေးရွာအုပ်ချုပ်ရေးမှူးဟောင်းကို အလုပ်နှင့်ထောင်ဒဏ် ၇ နှစ် မွန်ပြည်နယ်တရားလွှတ်တော်က ချမှတ်လိုက်ကြောင်း အဂတိလိုက်စားမှု တိုက်ဖျက်ရေးကော်မရှင်က ထုတ်ပြန်ကြေညာသည်။

ရန်ကုန်တိုင်းဒေသကြီး၊ သင်္ဃန်းကျွန်းမြို့နယ်နေ နစ်နာသူက ၎င်းပိုင်ဆိုင်သော မွန်ပြည်နယ်၊ ကျိုက်ထိုမြို့နယ်၊ ကင်မွန်းချောင်းကျေးရွာအုပ်စု၊ ကွင်းအမှတ်(၁၇၅)၊ ကဒတ်ချောင်းအပြင်ကွင်း၊ ဦးပိုင်အမှတ် (N-18)၊ ဧရိယာ(၂ ဒသမ ၃၀)ဧကအား စောင့်ရှောက်ရန်အတွက် စာရွက်စာတမ်းများဖြင့် တရားဝင် ပြန်လည်လွှဲအပ်ခြင်းခံရသူမှ ဆေးကုသမှု ခံယူနေစဉ်အတွင်း ကျိုက်ထိုမြို့နယ်၊ ကင်မွန်းချောင်းကျေးရွာအုပ်စု အုပ်ချုပ်ရေးမှူးဦးကျော်သူရလှိုင်သည် မည်သူ့မှ အသိပေး အကြောင်းကြားခြင်း မပြုဘဲ ၎င်းမြေကွက်၏ ပုံစံ(၇)အား တရားမဝင် ထုတ်ယူခဲ့ပြီး ပုံစံ(၇)စာရွက်စာတမ်းများကို အကြောင်းပြု၍ မြေဝယ်ယူသူထံမှ ငွေကြေး ကျပ်သိန်းပေါင်း ၃၉၅၀ တိတိအား လက်ခံရယူခဲ့ခြင်း အပေါ် အရေးယူပေးပါရန် အဂတိလိုက်စားမှုတိုက်ဖျက်ရေးကော်မရှင်သို့ တိုင်ကြားခဲ့ခြင်းဖြစ်ကြောင်း သိရှိရသည်။

နစ်နာသူ၏ တိုင်ကြားစာအရ အဂတိလိုက်စားမှုတိုက်ဖျက်ရေးကော်မရှင်က စုံစမ်းစစ်ဆေးရေးအဖွဲ့ ဖွဲ့စည်း စစ်ဆေးခဲ့ရာ မွန်ပြည်နယ်၊ ကျိုက်ထိုမြို့နယ်၊ ကင်မွန်းချောင်းကျေးရွာအုပ်စု အုပ်ချုပ်ရေးမှူးဟောင်း ဦးကျော်သူရလှိုင်သည် ၎င်းတာဝန်ထမ်းဆောင်နေသည့် ကာလအတွင်း အခွင့်အာဏာကို အသုံးပြုပြီး အဂတိလိုက်စားမှုကျူးလွန်ခဲ့ကြောင်း စစ်ဆေးပေါ်ပေါက်သဖြင့် မွန်ပြည်နယ်၊ ကျိုက်ထိုမြို့နယ်၊ ကင်မွန်းချောင်းကျေးရွာအုပ်စု အုပ်ချုပ်ရေးမှူးဟောင်း ဦးကျော်သူရလှိုင် အား အဂတိလိုက်စားမှု တိုက်ဖျက်ရေးဥပဒေ ပုဒ်မ ၅၆ အရ မွန်ပြည်နယ်တရားလွှတ်တော်တွင် ၂၀၁၇ ခုနှစ် ဇူလိုင်လ (၃၁)ရက်နေ့၌ တရားစွဲဆို တင်ပို့ခဲ့ကြောင်း၊ မွန်ပြည်နယ် တရားလွှတ်တော်က ရာဇဝတ်ကြီးမှုအမှတ် ၃/၂၀၁၇ ဖြင့် လက်ခံစစ်ဆေးခဲ့ပြီး ပြစ်မှုထင်ရှားသဖြင့် ဦးကျော်သူရလှိုင် အား အလုပ်နှင့် ထောင်ဒဏ် (၇)နှစ် ကျခံစေရန် ၂၀၁၈ ခုနှစ် ဒီဇင်ဘာလ ၁၃ ရက်နေ့တွင် အမိန့်ချမှတ်ခဲ့ကြောင်း သိရှိရသည်။

သင့်ရဲ့ထင်မြင်ချက်ကို မှတ်ချက်ပေးလိုက်ပါ

Related Posts